O Concello de Cambre abrirá o vindeiro 7 de xullo o prazo de inscrición no Programa Mañanceiro para o curso escolar 2026-2027, un servizo municipal de atención, vixilancia e almorzo dirixido ao alumnado dos centros de Educación Infantil e Primaria do municipio.
O programa ten como obxectivo facilitar a conciliación das familias, ofrecendo atención ao alumnado antes do inicio da xornada lectiva.
O prazo de presentación de solicitudes permanecerá aberto do 7 de xullo ao 7 de agosto de 2026. Non obstante, tamén se poderán presentar solicitudes ao longo do curso escolar, tendo en conta que, no caso de que o grupo xa conte co máximo de escolares, a persoa solicitante será incluída na lista de agarda.
O servizo desenvolverase nos seguintes centros educativos do municipio:
- Escola de Educación Infantil San Bartolomeu de Pravio.
- CEIP Gonzalo Torrente Ballester de Sigrás.
- CEIP Wenceslao Fernández Flórez de Cambre.
- CEIP Emilio González López de Brexo-Lema.
- CEIP Portofaro.
- CEIP Plurilingüe Graxal.
Poderán participar os nenos e nenas empadroados no Concello de Cambre e matriculados nun centro escolar de Educación Infantil ou de Educación Infantil e Primaria do municipio. No caso de existir prazas vacantes, poderán admitirse participantes non empadroados.
O Programa Mañanceiro desenvolverase de luns a venres nos días lectivos, segundo o calendario escolar oficial do curso 2026-2027, en horario de 7:30 horas ata o comezo da xornada escolar de cada centro.
O inicio do servizo coincidirá co primeiro día oficial do curso escolar 2026-2027. No caso do alumnado de 3 anos, comezará unha vez rematado o período de adaptación e cando inicie a súa xornada escolar completa.
As familias poderán solicitar diferentes modalidades:
- Mes completo ou días soltos (ata un máximo de 12 días).
- Con almorzo ou sen almorzo.
O programa contará con persoal cualificado encargado da realización de actividades de ocio e tempo libre, así como da organización, elaboración e servizo do almorzo para o alumnado participante que o solicite.
O número máximo de prazas dispoñibles para cada centro será inicialmente de 26 escolares, aínda que poderá variar en función da demanda real, do espazo dispoñible en cada centro e do orzamento existente.
As solicitudes deberán presentarse mediante o formulario correspondente a través da sede electrónica da web municipal ou en calquera dos Rexistros de Entrada do Concello de Cambre.
O Concello publicará o 28 de agosto de 2026 unha información inicial sobre as solicitudes recibidas. Posteriormente, unha vez estudadas e resoltas, publicarase a relación de persoas admitidas, excluídas e a lista de agarda antes do inicio do curso escolar 2026-2027.
As vacantes que se produzan ao longo do curso serán cubertas polos nenos e nenas incluídos na lista de agarda.
Para máis información, as familias poden contactar co departamento de Educación do Concello de Cambre:
Teléfono: 981 61 32 91
Correo electrónico: educacion@cambre.org