A mostra itinerante da Deputación da Coruña busca achegar á cidadanía a riqueza dos sectores mariñeiro e agrogandeiro da provincia
O Museo Arqueolóxico de Cambre acollerá, do 1 ao 15 de setembro, a exposición itinerante «Do mar e da terra», unha iniciativa promovida pola Deputación da Coruña para dar a coñecer e poñer en valor a riqueza dos sectores mariñeiro e agrogandeiro da provincia.
A mostra pretende sensibilizar á cidadanía sobre a importancia destas actividades, especialmente no relativo á sostibilidade, á produción e ao consumo de proximidade e á calidade dos produtos procedentes do mar e do medio rural.
A exposición está integrada por sete paneis expositivos e complétase con contidos interactivos, pensados tamén como recurso didáctico para achegar esta realidade á comunidade educativa.
A iniciativa percorrerá diferentes concellos da provincia ao longo do ano e permanecerá en Cambre durante a primeira quincena de setembro.
Datas: do 1 ao 15 de setembro de 2026
Lugar: Museo Arqueolóxico de Cambre