O Concello de Cambre informa sobre o procedemento para solicitar autorizacións para a realización de cacharelas e sardiñadas con motivo da festividade de San Xoán.
As persoas interesadas en realizar cacharelas ou sardiñadas en espazos públicos deberán solicitar a correspondente autorización municipal, indicando os datos da persoa responsable e o lugar de emprazamento.
As solicitudes poderán recollerse no Salón de Plenos da Casa Consistorial os días 15, 16, 17, 19 de xuño, en horario de 10:00 a 13:00 horas.
No caso das cacharelas ou sardiñadas en espazos privados, e co fin de evitar incidencias, as persoas responsables deberán presentar previamente unha comunicación no Concello de Cambre.
O bando municipal establece tamén as condicións de seguridade para a celebración destas actividades, incluíndo a prohibición de realizar fogueiras en beirarrúas, prazas públicas ou lugares non autorizados, así como a obriga de manter as distancias de seguridade establecidas e dispoñer de medios de extinción axeitados.
Os permisos concederanse exclusivamente para a noite do 23 ao 24 de xuño. O horario para levar o material aos lugares autorizados establécese a partir das 16:00 horas do día 23.
O Concello fai un chamamento á responsabilidade da veciñanza para garantir unha celebración segura e respectuosa coas normas establecidas.
O bando completo pode consultarse no documento adxunto.