O Concello de Cambre pon en marcha o Ciclo de teatro de outono durante os meses de outubro e novembro no centro sociocultural do Graxal. O programa conta cunha oferta de seis representacións de balde. As persoas interesadas poderán reservar as súas entradas a través do teléfono 881 917 432 ou do 649 891 212 o propio día do evento. O sábado, 21 de outubro, ás 19:00 horas, no centro sociocultural do Graxal, terá lugar a representación de "Running Unha Suorenta" da compañía De Ste Xeito. A obra está destinada a un público maior de 16 anos, e conta a historia de Xulia e Román. Ambos os dous acaban de coñecerse e as súas familias, as súas vidas e os seus medos, impídenlles dar renda solta ao seu amor.