O alcalde de Cambre, Óscar García Patiño, o primeiro edil de Oleiros, Ángel García Seoane, o de Sada, Benito Portela Fernández, e a rexedora de Bergondo, Alejandra Pérez Máquez, mantiveron, esta mañá, unha reunión co director xeral de  Emalcsa, Jaime Castiñeira. O obxectivo deste encontro foi abordar a orixe dunha problemática que está a afectar aos catro municipios: os episodios de turbidez na auga producidos nas últimas semanas.
Os rexedores manifestaron a súa “preocupación” por estas incidencias na subministración e destacaron que estes problemas “son comúns  nestes meses”. Así mesmo, todos coincidiron na “necesidade de buscar a mellor das solucións e garantir un correcto servizo para os veciños e  veciñas”.  A este respecto, Emalcsa informou de que está a traballar na elaboración dun estudo xunto coa Universidade da Coruña para dilucidar as causas destas incidencias e poder así emendalas.
A maiores, abordouse a construción do futuro depósito de auga de San Pedro, un proxecto que os rexedores cualificaron de “imprescindible e  urxente”. Esta instalación permitiría dispoñer dunha maior capacidade de almacenamento e serviría para reducir o número de incidencias no abastecemento de auga, segundo confirmaron desde a propia compañía subministradora.
Ao remate do encontro, acordouse solicitar á Xunta de Galicia unha reunión para solicitar a colaboración do organismo autonómico na execución deste proxecto. Nesta reunión estarían representados os catro Concellos que se verían beneficiados por esta obra, así como Emalcsa.