O centro de saúde de Cambre recibiu este mércores, 18 de novembro, a visita do conselleiro de Sanidade, Antonio Gómez Caamaño, que destacou o papel destas instalacións na posta en marcha do novo modelo de axendas de atención primaria. Na visita participaron tamén a directora xeral de Planificación e Reforma Sanitaria, Sofía López, e o xerente da área sanitaria da Coruña e Cee, Luis Verde.

Cambre foi un dos primeiros centros galegos en incorporar esta nova organización, que funciona desde o pasado 5 de outubro nos seus dez cupos de medicina de familia. O proxecto busca garantir máis tempo para cada consulta e dar unha resposta ordenada ás necesidades dos pacientes, evitando unha sobrecarga permanente dos profesionais.

A alcaldesa, Diana Piñeiro, agradeceu a visita do conselleiro e a elección do centro para participar nesta experiencia. «Agradecemos á Consellería de Sanidade que conte con Cambre para poñer en marcha un proxecto que busca mellorar a atención á nosa veciñanza. Dispoñer de máis tempo na consulta e facilitar unha resposta cando se necesita son cuestións que teñen unha repercusión directa no día a día das persoas», sinalou.

Piñeiro trasladou tamén o seu recoñecemento ao persoal sanitario: «Detrás de cada consulta hai profesionais que coidan de nós e das nosas familias. O seu traballo e a súa experiencia son fundamentais para que estas melloras respondan ás necesidades reais dos pacientes».

O novo modelo establece axendas comúns cun máximo de 30 citas diarias en medicina de familia e de 25 en pediatría, reservando tamén tempo para a atención programada e outras actividades asistenciais. Incorpora, ademais, axendas específicas para atender os pacientes que precisen asistencia no mesmo día cando a axenda habitual do seu médico xa estea completa.

No caso de Cambre, esta atención adicional organízase mediante un módulo de tres horas pola mañá e outro de dúas horas pola tarde. Estas axendas son asumidas voluntariamente polos profesionais, fóra da súa xornada común e cunha planificación acordada polos equipos.

O centro de saúde atende unha poboación de 16.100 persoas e conta con dez médicos de familia, tres pediatras e once profesionais de enfermaría, ademais de matronas e persoal de traballo social, nutrición e xestión e servizos. Entre as súas prestacións figuran o seguimento de pacientes crónicos, a atención domiciliaria, a cirurxía menor, as ecografías e distintas probas diagnósticas.

Segundo a información trasladada por Sanidade, nos últimos anos reforzáronse os recursos sanitarios do municipio coa incorporación dun médico de familia máis en Cambre e outro no Temple, ademais dun profesional de nutrición e outro de farmacia. O centro de Cambre tamén recibiu novo equipamento, con dous electrocardiógrafos, un espirómetro, dous dispositivos hólter e un retinógrafo.

Esta iniciativa enmárcase no Plan de reforma da Atención Primaria e Comunitaria de Galicia 2026-2030, dotado con máis de 320 millóns de euros e que prevé a creación dunhas 644 novas prazas no conxunto de Galicia.

Durante a visita, o conselleiro avanzou que está previsto completar en decembro a implantación do proxecto nos centros piloto das sete áreas sanitarias. Esta fase permitirá avaliar o funcionamento do modelo e introducir os axustes necesarios antes da súa extensión, contando coa experiencia e as achegas dos profesionais implicados.

Resumen de privacidad

Esta web utiliza cookies para que podamos ofrecerte la mejor experiencia de usuario posible. La información de las cookies se almacena en tu navegador y realiza funciones tales como reconocerte cuando vuelves a nuestra web o ayudar a nuestro equipo a comprender qué secciones de la web encuentras más interesantes y útiles.