A alcaldesa de Cambre, María Pan Lesta, e o concelleiro da Axencia de Desenvolvemento Local, Ramón Boga, visitaron as instalacións da destilería Vánagandr, gañadora do premio International Spirits Challenge 2024 á mellor xenebra. Deste xeito, continúa o contacto con diversas empresas e persoas emprendedoras do municipio.

Alí foron recibidos polo fundador da compañía, Enrique Pena, que deu a coñecer a súa traxectoria profesional e o camiño percorrido ata lanzar ao mercado a xenebra Vánagandr, un produto que recibiu prestixiosos premios e recoñecementos a nivel internacional pola súa calidade.

Durante unha visita polas súas instalacións, o empresario mostrou o proceso de destilación da xenebra, que se realiza con ingredientes de primeira calidade, contén unha mestura secreta de botánicos sen engadir produtos posteriormente e que xa ten presenza en países como Estados Unidos, Australia ou Xapón.

Ademais de explicar parte do proceso produtivo e de investigación, Enrique Pena comentou algunhas das creacións nas que xa traballan, coas que buscarán repetir o éxito alcanzado en 2024, ano no que Vánagandr coroouse como gañadora do premio International Spirits Challenge á mellor xenebra “London Dry” do mundo.

“É un orgullo contar no noso concello con empresas como Vánagandr, cunha clara aposta pola calidade e vocación internacional, e cun equipo de profesionais con entusiasmo e paixón polo que fan, e que levan o nome de Cambre polo mundo adiante”, destacó la alcaldesa.