Helsinki e Cambre están unidos a través dun novo programa no que participa o IES David Buján e o seu homólogo finlandés Taivallahden Peruskoulu. A alcaldesa, María Pan, recibiu, esta semana, aos estudantes cambreses e finlandeses que están a participar neste intercambio lingüístico Erasmus+. A rexedora deulles aos mozos e mozas a benvida, animándoos a seguir participando neste tipo de iniciativas “coas que continuades aprendendo tamén fóra das aulas”.

Durante a recepción, a rexedora realizou unha breve presentación na que expuxo aos visitantes algúns dos atractivos do municipio, como a igrexa románica de Santa María de Cambre, o paseo fluvial ou o paso polo concello do Camiño Inglés, así como eventos como o Entroido, a Galaicoi, a feira Open Science ou o festival Rock in Cambre.

No mes de febreiro, foron os cambreses os que se desprazaron a Helsinki. Agora, as finlandesas fixeron o propio, participando, ao longo da semana, nun completo programa de actividades. Entre elas, nas clases do instituto cambrés co obxectivo de seguir perfeccionando o seu nivel de español. A maiores, tiveron tempo para visitar a igrexa de Santa María de Cambre e o Museo do Xacemento e os museos e a Torre de Hércules da Coruña. O programa incluíu tamén unha clase de surf, un taller de elaboración de pan e mesmo a realización dun tramo do Camiño de Santiago.