A concelleira de Educación, Ana Rodríguez López, o de Desenvolvemento Socioeconómico, Diego Alcantarilla, e o bibliotecario, Gaspar Domínguez, recibiron esta mañá na Biblioteca Central Municipal ás tres profesoras portuguesas que esta semana visitan o municipio para facer unha estancia formativa de ‘Job Shadowing’.

Esta técnica educativa implica pasar un período breve de tempo nun lugar para observar e coñecer en primeira persoa o traballo diario dos profesionais do centro, neste caso o IES David Buján. Deste xeito, Alda Franco, Aldina Gregório e Carmen Vieira, profesoras na Escola Secundaria de Madeira Torres, en Torres Vedras (Portugal), actúan como observadoras para vivir o traballo que se desenvolve a diario.

Ademais de coñecer e participar en distintas actividades educativas desenvoltas no centro, as tres mestras están a coñecer outros puntos e servizos do municipio, como a biblioteca.

Alí tomaron contacto coas instalacións, coñeceron os distintos materiais de lectura dispoñibles e as iniciativas que se desenvolven nas instalacións.

A edil de Educación destacou que “desde a Concellería de Educación aplaudimos este tipo de iniciativas, xa que consideramos que o intercambio cultural é algo moi positivo para todos e todas”, ademais, aproveitou a oportunidade para animar “ao profesorado a continuar desenvolvendo este tipo de accións e actividades, que son do máis enriquecedoras para todas as persoas participantes”.

Pola súa banda, Alcantarilla agradeceu o traballo realizado desde os centros educativos e a presencia no municipio destas tres mestras “esta visita favorece a creación de vínculos entre os dous países e a adquisición de distintos coñecementos culturais e educativos que, de seguro, favorecen o desenvolvemento de novas aprendizaxes”.