O salón de plenos da Casa do Concello acolleu na mañá deste martes 22 a visita do alumnado e profesorado da Wychwood School de Oxford (Inglaterra), que se atopan en Cambre como parte dun intercambio lingüístico co IES David Buján.

Na visita participaron trece alumnas e alumnos ingleses de entre 13 e 19 anos, que permanecerán en Galicia ao longo desta semana, asistindo a clases e realizando visitas e actividades. Á súa vez, estiveron acompañados de profesorado e outros trece alumnos de 3º, 4º de ESO e 1º de Bacharelato do IES David Buján, cos que comparten esta iniciativa.

A alcaldesa María Pan foi a encargada de recibir a alumnado e profesorado nas instalacións municipais. Durante unha breve presentación, a rexedora expuxo aos visitantes algúns dos atractivos do municipio, como a Igrexa románica de Santa María de Cambre, o paseo fluvial ou o paso polo concello do Camiño Inglés, así como eventos como o Entroido, o Galaicoi, a feira OpenScience ou o festival Rock in Cambre.

Para concluír o acto, representantes do centro educativo inglés ofreceron como obsequio ao Concello un libro dedicado con imaxes e ilustracións de Oxford.