O esforzo e a creatividade teñen premio. E se non, que llo pregunten aos seis establecementos de Cambre que se converteron en gañadores do XIV Concurso de Escaparates de Nadal: J. Kids, Entretelando, Endulzarte, Bicicletas Brais Chas, Farmacia O Temple e La Románica. O edil de Desenvolvemento Socioeconómico, Diego Alcantarilla, felicitou, persoalmente, a algúns dos galardoados desta edición, agradecéndolles “a súa grande implicación neste tipo de iniciativas, coas que buscabamos incentivar as compras e o consumo nos negocios de Cambre durante as festas de Nadal”. A catorce edición congregou a uns corenta negocios do termo municipal. De entre os participantes, un xurado escolleu aos seus favoritos e entregou un 1º, 2º e 3º premio, así como dous accésit, un á sustentabilidade e outro por adecuación ao produto. A maiores, a cidadanía puido conceder tamén, a través dos seus votos, un dos galardóns á súa proposta favorita. A relación de premiados é a que, a continuación, indícase:

• J. Kids moda infantil: 1º premio (1.000 euros)
• Entretelando: 2º premio (700 euros)
• Endulzarte: 3º premio (500 euros)
• Bicicletas Brais Chas: accésit por sustentabilidade (400 euros)
• Farmacia O Temple: accésit por adecuación ao produto (400 euros)
• La Románica: premio por votación popular (1.000 euros)