A paz en Cambre durou só un ano. Os dous bandos historicamente enfrontados, o dos castrexos e o dos romanos, retomaron, esta tarde, as hostilidades na VI Galaicoi. A declaración da guerra chegou despois de celebrarse a asemblea dos clans, marcando o inicio de numerosas escaramuzas e batallas que se prolongarán durante toda a fin de semana. O enfrontamento concluirá, previsiblemente, o domingo, ao redor das 19.45 horas, coa firma da paz. As pelexas centrarán boa parte do programa. Mañá, sábado 15 de xullo, terá lugar unha escaramuza entre os dous bandos (12.00 horas) e ás 19.00 horas será o asedio e asalto ao Castromaior. O domingo, ás 12.30 horas, castrexos e romanos encerellaranse nunha nova escaramuza para disputar, ás 19.00 horas, a batalla final. A sexta Galaicoi incluirá, ademais, un mercado galaico-romano con preto de 50 postos de venda, talleres de oficios tradicionais (cuñaxe de moedas, talla en pedra, elaboración de perfumes, forxa artística), animación musical e representacións teatrais. En concreto, a compañía Noite Bohemia interpretará dúas obras: Xemelos, comedia de Plauto (venres, 14 de xullo, ás 22.00 horas no teatro do Parque dá Igrexa) e Medea, traxedia de Eurípides (sábado, 15 de xullo, ás 22.00 horas no teatro do Parque dá Igrexa).