A música e o baile marcan a inauguración do primeiro Poboado de Nadal da historia de Cambre

23 Dec 2022

Tamén che pode interesar

A música e o baile marcaron, onte, a inauguración oficial do primeiro Poboado de Nadal da historia de Cambre. En concreto, da man do alumnado da Academia de Baile SBM & Sto dance, o público asistente puido gozar de varias actuacións realizadas por parte do cadro de persoal de bailaríns da escola. A programación no poboado continuará ao longo de todo o Nadal, ofrecendo aos nenos e nenas talleres, actividades ao aire libre e as visitas de Papá Noel e os seus elfos. O Poboado de Nadal estará localizado no parque Ramón Barba ata o 5 de xaneiro. O recinto contará con varias casetas onde se levarán a cabo talleres e visitas de Papá Noel e os seus elfos. A maiores, sempre que as condicións climatolóxicas permítano, estas propostas combinaranse con outras actividades ao aire libre. Salvo os días 25 de decembro e 1 de xaneiro, haberá un taller infantil de forma diaria. En canto ao horario, estes serán de 17.00 a 21.00 horas, menos o 24, o 31 de decembro e o 5 de xaneiro, cando se organizarán de 12.00 a 14.00 horas e de 17.00 a 19.00 horas. Acompañados por monitores, os e as participantes realizarán talleres de decoración de bolsas de papel, adornos para a árbore, colaxe, cociña, portavelas, chapas, pestillos, reciclaxe, centros florais, monicreques e agasallos. Os nenos e nenas que desexen coñecer a Papá Noel e aos elfos terán a ocasión de facelo tanto hoxe, venres 23 de decembro (de 17.00 a 21.00 horas), como mañá, sábado 24, de 12.00 a 14.00 e de 17.00 a 19.00 horas. O Poboado será, ademais, o escenario do espectáculo Kote (30 de decembro ás 18.00 horas), no que se combinarán o circo, o teatro, os malabares e o humor.