A protección dos datos persoais, o coidado da privacidade, a procura de información, o ciberacoso ou o tempo de uso das redes sociais. Estes serán, unicamente, algúns dos temas que se abordarán durante o Campamento Dixital que a OMIX de Cambre celebrará en Semana Santa xunto á Fundación Cibervoluntarios. O programa desenvolverase ao longo de tres xornadas, entre o 14 e o 16 de abril.

Con esta iniciativa buscarase que os mozos aprendan mentres se divirten, traballando ao redor das seguintes premisas: o futuro está nas súas mans, deben saber dominar e controlar o tempo de uso da internet e redes sociais, teñen que prestar atención á protección dos seus datos persoais e, por último, que existen múltiples ferramentas dixitais coas que potenciar a súa carreira.

Ao longo das sesións daránselles pautas para buscar información de valor na internet, filtrando datos dunha maneira máis efectiva, descubrirán competencias dixitais útiles para a procura de emprego e aprenderán a facer un uso consciente da internet e das redes sociais. Así mesmo, informaráselles sobre a importancia de coidar da súa privacidade, axudándolles a crear contrasinais seguros e a protexer os seus datos persoais.

Todas as actividades levaranse a cabo en Casa Arrigada e en horario de 10.00 a 13.00 horas e están dirixidas a mozos e mozas de entre 14 e 17 anos. As inscricións poden tramitarse xa a través do formulario online.