Prohibido non tocar, prohibido non copiar e feita por e para mozos. Estas foron as bases coas que a Open Science de Cambre se concibiu no ano 2018. A feira científica, organizada polo Concello e a Asociación Xuvenil XenTD100cia, vivirá, estes días, a súa sexta edición. Con todo, o evento manterá a esencia das súas orixes, tendo estes tres lemas máis presentes que nunca. Así o confirmaron, esta mañá, o alcalde, Óscar García Patiño, o concelleiro de Seguridade Cidadá, Patrimonio, Turismo, Transformación Dixital e Innovación Tecnolóxica, Daniel Mallo, e as dúas codirectoras, Aroa Silva Pouse e Paula Méndez Gómez. A cita comezará este venres, 15 de setembro, e prolongarase ata o domingo, día 17, ofrecendo tres días completos de programación para todos os públicos.
Durante a súa intervención, o rexedor lembrou que o trazo diferencial da feira é, precisamente, “que está organizada polos mozos e mozas”. García Patiño lembrou “a dificultade de realizar un evento destas características, polo que facela sendo tan novos ten moito mérito”. O alcalde agradeceu “o enorme traballo e dedicación” do equipo de voluntarios e confirmou o compromiso do goberno local “para que a Open Science continúe medrando”. Pola súa banda, Daniel Mallo apuntou algunhas cifras que veñen confirmar a tendencia á alza da Open Science: “nesta edición contaremos con 100 casetas, presentaranse proxectos de 80 colexios e prevese a participación duns 350 nenos e nenas”.
Actividades para todos os públicos
Pola súa banda, as codirectoras explicaron como será a programación desta sexta edición. Como nos últimos anos, as actividades realizaranse no Parque da Igrexa, no CEIP Wenceslao Fernández Flórez e no pavillón Sofía Toro.
As propostas comezarán o venres, ás 21.00 horas, con Ciencia Nocturna, un conxunto de espectáculos que correrán a cargo de Espiciencia, Cía de María, XenTD100cia e David Ballesteros. O sábado, día 16, a feira inaugurarase ao redor das 12.00 horas e desenvolverase ata as 19.00 horas, mentres que o domingo, día 17, a Open estará dispoñible de 10.00 a 14.00 horas. O programa incluirá talleres, presentación de proxectos escolares, postos de divulgación dos colexios participantes. A feira científica concluirá o domingo, ao redor das 13.00 horas, coa entrega dos premios OSC 2023.
Unha das propostas máis novas desta edición será a incorporación de actividades relacionadas coa animación dixital. En concreto, a VI Open Science ofrecerá dous talleres vinculados a este tópico: un taller de animación dixital co gañador do Goya, Xosé Zapata (sábado, ás 17.00 horas, no CEIP Wenceslao Fernández Flórez) e outro coa lead level designer en videoxogos Smalland, Cristina García Aradas, Mapache, (domingo, ás 11.00 horas, tamén no colexio).
Outra das iniciativas máis interesantes da Open consistirá nun relatorio a cargo do responsable de Educación e Divulgación da fundación Margarita Salgas, David Perezagua. O físico impartirá a charla Margarita Salgas. Unha científica singular nun momento singular.
Un traballo en equipo
Aroa e Paula estréanse , este ano, na codirección da feira. Con todo, a súa implicación coa Open Science vén de anos. As dúas mozas foron elixidas polo resto dos seus compañeiros para converterse en as caras visibles desta edición. En todo caso, o funcionamento da Open estará supeditado ao traballo do equipo de voluntarios que, nesta ocasión, serán tanto do IES David Buján e do Afonso X O Sabio como dalgún centro da Coruña. Os mozos e mozas, de entre 12 e 21 anos, estarán divididos en oito comisións: información, xurado, e-sports, espectáculos, acollida e comida, redes sociais, audiovisuais e drons.
Durante a presentación, as dúas mozas animaron ao resto dos seus compañeiros para implicarse “de cheo” na feira científica ao longo de toda a fin de semana. Desta forma, como recoñeceron, a Open Science “é unha oportunidade única coa que veredes que podedes conseguir todo o que vos propoñades”.