A orixinalidade, a creatividade, o uso de materiais reciclados, a posta en escena, e a conservación da tradición. Estes serán, unicamente, algúns dos aspectos que o xurado do Entroido Pequeno Máis Grande do Mundo terá en conta á hora de outorgar os galardóns do concurso de disfraces, comparsas e carrozas. A cita, que conta cun gran arraigamento no municipio, celebrarase o 25 de febreiro.
Por unha banda, na modalidade de disfraces haberá dúas categorías: infantil (dirixida a menores de 12 anos) e xeral (a partir dos 12 anos). En ambas as dúas poderase participar de forma individual ou en grupo. No caso dos grupos terase en conta a idade da maioría das persoas participantes para incluír á agrupación nunha ou outra categoría.
Polo outro, na modalidade de comparsas poderán participar as agrupacións previamente rexistradas e compostas por un mínimo de seis persoas con disfraces relacionados entre si. Unha vez estean no escenario –e ante o xurado do certame- poderán realizar un pequeno espectáculo de tres a catro minutos. As comparsas do municipio que tomen parte no concurso recibirán unha gratificación de 100 euros –sempre que o número delas non supere o total de cinco-.
Por último, á modalidade de carrozas poderán sumarse aquelas compostas por seis ou máis compoñentes, inscritas previamente, presentes no punto de saída e que participen no desfile ata o Campo da Feira.
Un xurado valorará aos mellores participantes de cada categoría tendo en conta os seguintes criterios: orixinalidade, estética, creatividade e traballo na elaboración dos disfraces, comparsas e carrozas; posta en escena, animación musical, capacidade de interacción do público e mobilización das masas, sátira e crítica social; conservación do Entroido tradicional e uso do galego –tanto oral como escrito-, emprego de materiais reciclados e inspiración en fontes culturais para a temática das carrozas, comparsas e disfraces.
Tras a decisión do tribunal, entregaranse os seguintes premios:
- Disfraces
Infantil: 150 euros
Xeneral: 150 euros
- Comparsas
1º premio: 300 euros
2º premio: 200 euros
- Carrozas
1º premio: 500 euros
2º premio: 400 euros
3º premio: 250 euros
4º premio: 150 euros
O período de inscrición estará aberto ata o día 20 de febreiro. As persoas interesadas en participar poderán anotarse mediante a presentación da solicitude nos Rexistros de Cambre ou a través da sede electrónica.
Ficha inscrición disfraces 2023