Este venres, ás 20:00 horas, a Casa da Cultura Vila Concepción de Cambre acollerá a proxección da película ‘Os demos de barro’, nomeada aos Premios Goya 2023 na categoría de Mellor película de animación e con 12 candidaturas previas. Esta longametraxe dirixida por Nuno Beato narra a historia de Rosa, unha muller moi profesional e valorada no mercado empresarial que, debido á esixencia do seu traballo, vese afastada do seu avó. A morte deste acaba provocándolle á protagonista un ataque de estrés que sementa a dúbida das súas decisións e fai que abandone a súa cidade para volver aos recordos da súa infancia. Pero esta viaxe non a fará soa, senón que estará acompañada dun grupo de demos de arxila que a consolan e guían no seu novo camiño. Ademais desta proxección, as persoas asistentes poderán coñecer en persoa a varios membros do equipo de produción como a xefa do departamento, Laura Zapata; aos modeladores Laura Blanco e Jorge Rodríguez “Gorka” e ao cambrés e director de animación David Saborido que, nesta ocasión, participou na película como animador e técnico de impresión 3D. Para o visionado do filme será necesario reservar entrada chamando ao 881 977 432 ou na propia Casa da Cultura.