A Policía Local de Cambre interceptou, o pasado luns, a tres persoas que furtaran produtos por valor de máis de 1.000 euros. As identificacións producíronse despois de que a empregada dun supermercado da capital municipal dese aviso á Policía Local. A traballadora informou a Policía de que tiñan retida a unha muller que tentara furtar produtos do negocio. As outras identificacións producíronse pouco despois, cando os axentes localizaron a un dos autores nas inmediacións do Paraugas do Temple. Este portaba numerosos artigos no seu vehículo cuxa procedencia non puido xustificar. Mentres ocorrían estes feitos, unha patrulla da Policía detivo a outro automóbil. Neste caso, tratábase dunha furgoneta con dous ocupantes que tentaran furtar no mesmo local e que foran sorprendidos cando sacaban os artigos sen pasar por caixa. Unha parte dos produtos subtraídos foron entregados no supermercado. Segundo indican desde a Policía Local, todo apunta a que repetirían estes feitos noutros concellos. Os individuos foron interceptados en Cambre cando se dirixían cara á Coruña, cidade onde residen. Agora mesmo, a Garda Civil tramita as dilixencias ao Xulgado por estes feitos.