A Policía Local de Cambre logrou frustar, onte á noite, un intento de roubo nun local de hostalería da capital municipal. Os feitos sucedéronse ao redor das 3.30 horas, cando os axentes recibiron a chamada dun veciño do Parque da Igrexa que advertía que escoitara golpes nos baixos comerciais da zona. A rápida intervención da Policía, que se desprazou ata o lugar poucos minutos despois de recibir a chamada, impediu a irrupción do home no negocio, que tan só alcanzou a provocar danos na cristaleira do local.

Os axentes revisaron a gravación dunha das cámaras do local e proseguiron coa súa investigación. Ao redor das 4.30 horas, a Policía cruzouse cun Citroën conducido por un home con características similares ás do home que tentara entrar no establecemento de Cambre. Nese momento, os axentes tentaron pecharlle o paso e un dos dous policías baixouse do coche para abrir a porta do Citroën. O home puxo o seguro e escapouse do lugar a gran velocidade.

Pouco despois, o home foi localizado en praza España pola Policía Nacional, logrando tamén fuxir do lugar. Finalmente, foi interceptado en Oleiros tras embestir a dous vehículos. A detención realizouse grazas á cooperación entre a Policía Local de Cambre e a Policía Nacional. A Garda Civil colaborou tamén nos labores de procura. O home será acusado por delitos de atentado, danos, roubo en grao de tentativa e furto de vehículo de motor.