A V Open Science, incluída na Semana Europea do Desenvolvemento Sostible

13 Set 2022

A feira cambresa é un dos 13 eventos promocionados de toda España.

A celebración da V Open Science está incluída dentro da Semana Europea do Desenvolvemento Sostible. A iniciativa, que inclúe propostas doutros 22 países, busca dar visibilidade ás actividades e eventos cunha liña de acción común: a promoción da sustentabilidade, da Axenda 2030 e os 17 ODS (Obxectivos de Desenvolvemento Sostible). O concelleiro de Deportes e Xuventude, Daniel Mallo, sinala “o gran orgullo que supón que a feira científica sexa un dous 13 únicos eventos do país en forman parte desta plataforma, que conta con usuarios e usuarias de todo o mundo”.

Esta canle conta con información sobre 2.750 eventos de 22 países que se celebrarán desde mediados de setembro ata o 8 de outubro. A Open Science é a única cita de Galicia que aparece recollida na páxina e unha das 13 a nivel nacional.

A edición máis longa da historia

A quinta edición da Open Science, organizada polo Concello e polo club XentD100cia do IES David Buján, será a máis longa da historia. O primeiro día vivirase o venres, 16 de setembro, de 21.00 a 23.00 horas. A intención é que a xornada sirva como primeira toma de contacto cos estudantes estranxeiros.

Os dous días seguintes, 17 e 18 de setembro, o programa contará con talleres, presentación de proxectos escolares, entrega dos premios OSC 2022 e con postos de divulgación (dos estudantes e de institucións).

Tamén che pode interesar