O jazz volverá marcar o ritmo do verán co VII Temple Jazz. O Concello sacou a licitación a organización da próxima edición, na que se prevé que se suban ao escenario Ánxeles Dorrio, Nostos, Marcos Pin cuarteto de guitarras e NGBM cuarteto. Como vén sendo habitual, os concertos celebraranse no parque Ramón Barba durante as noites do 7 e 8 de xullo.

A concelleira de Cultura en funcións, Mónica Varela, sinala o compromiso do Concello por “seguir apostando por este xénero musical, que reúne, ano tras ano, a un maior número de adeptos entre a veciñanza”.

Para a realización do festival, saen a contratación de varias prestacións estruturadas en dous lotes: por unha banda, a contratación e o servizo de dirección artística e, polo outro, o servizo e subministración de produción. O valor estimado do contrato é de 35.818,85 euros e o prazo de presentación de ofertas estará aberto ata o 12 de xuño.