Os vinte e cinco participantes do curso de monitor de actividades de tempo libre da OMIX de Cambre atópanse no ecuador do programa formativo. Trátase dunha formación que suscita interese entre os máis novos e que, para moitos deles e elas, se converte nunha auténtica oportunidade para ter a súa primeira oferta no mercado laboral. Ao longo dos últimos días, os mozos e mozas realizaron o módulo de campismo e actividades ao aire libre no albergue de Gandarío. Durante a fin de semana recibiron a visita do concelleiro de Desenvolvemento Socioeconómico, Diego Alcantarilla, e da edil de Xuventude, Ana Rodríguez.

O programa formativo arrincou a principios de setembro e prolongarase ata o 16 de decembro, ofrecendo un total de 200 horas lectivas aos alumnos e alumnas. Por medio desta acción formativa, enmarcada no programa Trans-fórmate da Oficina Municipal de Información Xuvenil, o alumnado está a aprender técnicas de animación, xogos, actividades ao aire libre, algo de socioloxía, pedagoxía, psicoloxía, axudas e recursos públicos etc.

Na formación, os mozos están a abordar temáticas como educación ambiental, recursos, axudas públicas, lexislación e resolución de conflitos. Así mesmo, o curso inclúe un pequeno módulo de actividades para maiores e 3ª idade.

Unha vez concluídas as 200 horas lectivas, as persoas participantes deberán facer un período de prácticas doutras 150 horas. Ao completar ambas as partes, os participantes recibirán o título oficial de monitor.