O Pavillón Sofía Toro de Cambre acolleu os días 15 e 22 de marzo a fase local “As Mariñas” de xadrez, integrada no programa de deporte escolar Xogade.

A competición reuniu a un total de 139 nenos e nenas, con idades comprendidas entre os 5 e os 14 anos, convertendo o municipio no epicentro do xadrez base da comarca durante dúas xornadas marcadas pola estratexia, a concentración e o xogo limpo.

No torneo participaron equipos procedentes dos concellos de Oleiros, Culleredo, Cambre, Carral e Sada, nun ambiente destacado pola deportividade entre os participantes.

O concelleiro de Deportes do Concello de Cambre, Omar Gonzalo, asistiu en representación do Concello á xornada, onde tamén participou na entrega de trofeos, poñendo en valor o esforzo dos participantes e o crecemento do xadrez na comarca.

Tras o éxito organizativo desta fase, o club Xadrez Das Mariñas será novamente o encargado de organizar a seguinte cita do calendario. A fase intercomarcal disputarase en Cambre o vindeiro 25 de abril, na que os equipos clasificados competirán cos mellores conxuntos das comarcas da Coruña e Bergantiños.