O goberno local acaba de dar un novo paso para axilizar a situación actual do Concello. En concreto, na xunta de goberno celebrada hoxe acordouse a adhesión de Cambre aos seguintes acordos marcos da Central de Contratación do Estado: subministración de enerxía eléctrica, vehículos automóbiles de turismo e, por último, subministración de motocicletas e ATV/QUADS. Na práctica, esta novidade traerá consigo varias vantaxes: o aforro económico, a redución da carga de traballo por parte do persoal técnico e a axilización dos prazos de tramitación de expedientes.

A edil de Economía, Facenda e Réxime Interior, María Pan, incide que a participación de Cambre nestes acordos marco implicará un aforro económico considerable e permitirá avanzar na tramitación de servizos en precario: “as licitacións faranse a través da propia Central de Contratación, regulándose así o servizo sen que isto conleve unha maior carga para o persoal técnico municipal e para o departamento de Contratación”.

A concelleira avanza que se está estudando a posibilidade de sumarse a novos acordos marco de material de oficina, papel, computadores de mesa, portátiles e outras solucións en postos de traballo e tamén ao de combustible.

A adhesión formalizarase a partir do día seguinte ao acordo da Dirección Xeral de Racionalización e Centralización da Contratación e deixará de ter efecto cando finalice a vixencia do propio acordo. En todo caso, os contratos continuarían en vigor ata a súa extinción.