Cambre acabar de iniciar o seu obradoiro de emprego PROXEDIS SOCIO Sanitario-Educativo. Con todo, respecto a outras edicións, o Concello incorporou unha nova especialización nesta convocatoria. Á parte da modalidade de Atención sociosanitaria a persoas dependentes en institucións sociais, está a impartirse formación sobre Promoción e intervención socioeducativa con persoas con discapacidade.

O concelleiro de Desenvolvemento Socioeconómico, Diego Alcantarilla, visitou, nos últimos días, ao alumnado-traballador desta edición. Na visita, o edil desexoulles un bo inicio no programa, incidindo en que lles brindará “a formación precisa para poder acceder a dúas especializacións cunha gran demanda no mercado laboral”. Durante a súa intervención, Alcantarilla explicou que, máis aló da parte teórica, “con esta experiencia ides ter a posibilidade de poñer en práctica o aprendido grazas ao período práctico nunha das entidades colaboradoras nesta edición”.

Estimular a empregabilidade

En total, están a tomar parte no taller un total de 20 persoas en situación de desemprego: 12 en atención sociosanitaria e outras oito na de atención socioeducativa. Con esta medida, o goberno local mantén a súa aposta por poñer en marcha medidas que estimulen a empregabilidade, ofrecéndolles un programa completo de 12 meses.

En primeiro lugar, terá lugar a parte teórica, que se está desenvolvendo no centro municipal de formación do Espírito Santo. A continuación, as persoas participantes continuarán coa práctica nas entidades colaboradoras nesta convocatoria.

Como noutras edicións, o PROXEDIS SOCIO Sanitario-Educativo inclúe 20 incentivos á contratación do alumnado-traballador. O taller realízase co financiamento da Consellería de Promoción do Emprego e Igualdade da Xunta.