Unir o Campo da Feira, a praza Europa e a zona da Casa do Concello, creando así un espazo no que o veciño sexa o protagonista. Esa é a proposta do Concello de Cambre para o núcleo urbano e que se fará realidade, proximamente, a través da remodelación da zona exterior da Casa do Concello. O proxecto, que comezou no mes de xullo e avanza a bo ritmo, supoñerá a creación dun espazo público na parte frontal do edificio consistorial, dando continuidade a outras intervencións executadas nos últimos anos.

O alcalde, Óscar García Patiño, sinala que estas obras supoñen dar un paso máis “para seguir avanzando na peonalización das zonas urbanas. Neste caso, garantiremos a conexión peonil entre o Campo da Feira, a praza Europa e a Casa do Concello”. García Patiño indica, ademais, que estas actuacións “seguen a liña de traballo pola que apostamos nos últimos anos e coa que buscamos crear espazos de encontro, lecer e esparexemento para os veciños e veciñas”.

As obras foron adxudicadas por máis de 60.000 euros e, con elas, cumpriranse os seguintes obxectivos: mellorar as condicións de accesibilidade e mobilidade peonil, poñer en valor os diferentes elementos patrimoniais da zona (igrexa de Santa María de Cambre e cruceiro) e garantir unha maior continuidade co Campo da Feira e a praza Europa.

Creación dun novo espazo de estancia

Por medio deste proxecto, elimináronse as escaleiras e a rampla existentes e elevouse a cota para permitir o acceso directo á Casa do Concello. Ao elevar dita cota, haberá sitio suficiente para crear un espazo de estancia que contará cunha área axardinada e varios bancos. Na zona do cruceiro habilitaranse dúas prazas de aparcadoiro restrinxido. Empregaranse dous tipos de pavimento distintos, un pétreo na zona peonil e no punto de acceso ao Campo da Feira e outro de formigón lavado para a calzada. A maiores, instalarase nova iluminación tanto na zona da praza como no paso de peóns.