O Concello de Cambre e os IES Afonso X O Sabio e David Buján buscan ás novas promesas da literatura co lanzamento dunha nova edición do Certame Xoán Díaz. O concurso, que leva xa trinta e unha edicións, busca estimular a creatividade dos mozos e mozas de entre 12 e 30 anos.
O certame conta con tres categorías en función da idade:
- Categoría A: de 12 a 14 anos
- Categoría B: para os de idades comprendidas entre 15 e 18 anos
- Categoría C: de 19 a 30 anos
Cada persoa poderá presentar unha proposta nalgunha das seguintes modalidades:
Poesía: deberán presentarse tres poemas como mínimo e de tema e forma libres.
Narración breve: a extensión máxima será de cinco páxinas por unha soa cara e de temática libre.
Microteatro: a extensión será de entre cinco e dez páxinas a unha cara e con temática libre.
En todo caso, todas as obras deberán estar escrituras en galego e terán que ser orixinais e inéditas (non podendo, ademais, ser premiadas con anterioridade). Os traballos terán que presentarse a través da sede electrónica entre o sábado, 12 de abril, e o mércores, 30 de abril. A solicitude deberá indicar que vai dirixida ao servizo de Bibliotecas e no texto figurarán o pseudónimo, o título da obra e a categoría. Cada persoa deberá achegar, de maneira anexa, tres arquivos. No primeiro irá a ficha de inscrición, no segundo o DNI e no terceiro terá que figurar o traballo. Tras a deliberación do xurado, entregaranse dous premios por categoría e modalidade, aínda que o xurado poderá declarar deserto calquera deles no caso de considerar insuficiente a calidade dos traballos presentados.
