O Concello de Cambre e a Asociación Micolóxica Andoa celebran este domingo, 17 de novembro, a tradicional Exposición Micolóxica, que alcanza a súa 31º edición. O evento terá lugar no patio do colexio Wenceslao Fernández Flórez, de 11:30 a 17:30 horas, con acceso e participación libre e gratuíta para todos os públicos.

As persoas que se pasen pola exposición poderán gozar dunha ampla e variada mostra de especies de cogomelos, recollidas e identificadas polo persoal experto de Andoa. Os propios especialistas estarán alí presentes para guiar aos visitantes, ofrecendo explicacións sobre características e curiosidades de cada especie exposta.

Ademais, aquelas persoas que o desexen poderán levar exemplares para que os expertos os identifiquen, enriquecendo así esta experiencia participativa.

Con esta exposición búscase achegar ao público o fascinante mundo dos cogomelos, destacar a gran riqueza e diversidade de especies presentes en Galicia, e promover unha visión positiva da micoloxía.

Para máis información sobre a Asociación Micolóxica Andoa, pódese consultar a súa páxina web https://andoa.org/.