En só tres días, o Concello completou a cota de prazas dispoñibles do programa ‘Come ben, vive san’. A iniciativa, posta en marcha desde a Concellería de Educación e Sanidade, buscará poñer o foco na alimentación saudable, en xeral, e na prevención fronte á obesidade, en particular. Tendo en conta o interese que esta iniciativa suscitou entre os veciños e veciñas, o concelleiro de Educación e Sanidade, Miguel Ángel Gutiérrez, considera un acerto seguir “apostando por este tipo de programas formativos e educativos cos que queremos concienciar á cidadanía sobre os beneficios de levar unha alimentación equilibrada”.
A programación levarase a cabo entre o 17 e o 21 de abril na aula Portomuíños da Barcala (de 19.00 a 20.00 horas). Cada xornada estará centrada nunha cuestión diferente. Desta forma, o calendario de actividades será o seguinte:
- Luns, 17 de abril: verduras atractivas
- Martes, 18 de abril: cociña con legumes
- Mércores, 19 de abril: tuppers saudables
- Xoves, 20 de abril: receitas rápidas saudables
- Venres, 21 de abril: sobremesas sas
Ao finalizar a actividade do venres, realizarase un sorteo de tres agasallos entre as persoas participantes en todas as xornadas. En concreto, sortearanse unha fritideira de aire, unha lékué para cociña en vapor e un libro de receitas sas.
A cota de actividades está chea, pero o Concello habilitou unha listaxe de espera con dous obxectivos: por unha banda, para ocupar as prazas vacantes que puidesen producirse en caso de baixa dalgún rexistrado/a e, polo outro, para avaliar cantos veciños e veciñas poderían estar interesados en tomar parte en próximas iniciativas relacionadas con esta temática.
Todas as actividades estarán dirixidas pola nutricionista e experta en alimentación, Carolina Mosquera. Mosquera xa impartira as sesións dentro da Semana da Alimentación Saudable, en febreiro do 2022. Na xornada inaugural tomará parte, ademais, a nutricionista do centro de saúde de Cambre, Rita Allegue, que asistirá á xornada de arranque do programa. Durante a súa intervención, Allegue informará as persoas rexistradas sobre o servizo asesoramento sobre nutrición que realizan desde o centro médico de Cambre, informando, ademais, sobre como se pode acceder ao mesmo.
