O Concello planea elaborar unha base de datos de grupos locais. Así o confirma o edil de Cultura, David Saborido, que explica que xa se está traballando para dispoñer desta ferramenta. O concelleiro apunta que esta permitirá ao Concello contar cunha especie de “mapa do talento local” ou, o que é o mesmo, saber cantos artistas hai en activo no municipio: “Cambre ten unha enorme vinculación coa música e, por iso, cremos que a disposición dunha base de datos permitiranos ter unha idea realista do número de grupos que hai”.

Os grupos ou artistas interesados poderán facilitar os seus datos a través do correo electrónico cultura@cambre.org. No envío poderán remitir calquera información que consideren de interese sobre a agrupación: nome da banda, membros que a integran, xénero, biografía etc. Así mesmo, poderán remitir tamén diferentes vías de contacto.

Cando manden a información, facilitaráselles un formulario para cumprimentar co que se fará o rexistro municipal correspondente. Así mesmo, informaráselles dos servizos que teñen á súa disposición. Entre eles, as bandas poden utilizar os locais de ensaio da área de Xuventude, que poderán pedir ao longo de todo o ano.