Cambre conmemorará o mes de Loita contra o Cancro de Mama coa celebración dunha charla e talleres de sensibilización

5 Out 2022

  • A iniciativa partiu do ofrecemento de Carolina Pan, unha veciña do municipio, paciente oncolóxica e activista que emprega as súas redes sociais para falar desta enfermidade.

O Concello de Cambre organizará un programa completo para conmemorar o mes de Loita contra o Cancro de Mama. A iniciativa partiu, directamente, do ofrecemento de Carolina Pan, unha veciña do municipio, paciente oncolóxica e activista que emprega as súas redes sociais, precisamente, para falar desta enfermidade. O concelleiro de Educación e Sanidade, Miguel Ángel Gutiérrez, sinala “a importancia” que este tipo de propostas “teñen á hora de concienciar e informar á poboación” e agradece, ademais, “a vocación divulgadora de Carolina Pan, que se ofreceu a contar a súa experiencia persoal de forma totalmente desinteresada”.

 

A programación arrincará o vindeiro xoves, 13 de outubro, ás 20.00 horas no salón de plenos do Concello. Ese día, Carolina Pan dará a charla “Mirándolle aos ollos ao cancro”. Ao longo da mesma, contará as súas vivencias persoais co cancro desde o diagnóstico da enfermidade ata a actualidade. A intención, tal e como explica a relatora, “é que a miña historia sirva para sensibilizar aos mozos e maiores sobre o cancro”. Neste sentido, Pan apunta que, “aínda hai xente que non sabe moito sobre esta enfermidade e, moi especialmente, sobre o meu tumor triplo negativo, o máis agresivo”.

 

Ao día seguinte, o venres día 14, farase un taller de uso de panos (de 18.00 a 20.00 horas no centro sociocultural da Barcala). A iniciativa está aberta a toda a cidadanía e, durante a mesma, ensinarase ás persoas participantes a utilizar panos na cabeza de varias formas.

 

O sábado, día 15, haberá dobre actividade. O centro sociocultural A Barcala acollerá, ás 18.00 horas, un taller de preparación da pel no proceso oncolóxico a cargo de Cristina Fernández (de Aquacgraph e On cosmetics). A continuación, ás 19.00 horas, celebrarase un taller de maquillaxe con Sabela Dobarro.

 

Todas as propostas serán de acceso libre e estarán abertas a toda a cidadanía. As actividades contan coa colaboración da Asociación Española contra o Cancro de Mama, coa Asociación Cancro de Mama Triplo Negativo e coa de varias compañías, entre elas Agasallos A Estrada.

 

Tamén che pode interesar