Cambre conmemorará o Día Mundial contra o Cancro con charlas a cargo de expertos e pacientes oncolóxicos

25 Xan 2023

Tamén che pode interesar

Cambre conmemorará o Día Mundial contra o Cancro cunha xornada de charlas a cargo de expertos e pacientes. O evento está organizado desde a Concellería de Educación e Sanidade en colaboración con Carolina Pan, veciña do municipio, paciente oncolóxica e activista que usa as súas redes sociais para falar sobre a enfermidade. A actividade levarase a cabo o sábado, 4 de febreiro, de 19.00 a 22.00 horas, no salón de plenos do Concello.

O concelleiro de Educación e Sanidade, Miguel Ángel Gutiérrez, sinala que esta proposta “busca concienciar á cidadanía, proporcionándolles información sobre algúns dos distintos tipos de cancro. Para iso, contaremos coa intervención de varios relatores do ámbito sanitario e tamén con pacientes oncolóxicos”. O edil agradece, de novo, a colaboración de Carolina Pan “e o seu interese por divulgar a súa experiencia e sensibilizar aos veciños e veciñas”, así como a todos os relatores que participarán nas charlas.

Na mesma liña, Carolina Pan sinala a “importancia” destas accións, que cualifica como “esenciais para que os veciños e veciñas teñan ao seu alcance máis información sobre esta enfermidade que afecta a miles de persoas”. Esta xornada terá para a cambresa un significado especial, non só porque poderá relatar ao público asistente o seu caso concreto como paciente de cancro de mama triplo negativo, senón tamén porque coorganiza a actividade lembrando á súa amiga Paula Botella, “que faleceu en novembro por un cancro de mama triplo negativo metastásico”.

A xornada busca funcionar como un debate no que o público poderá interactuar cos relatores que, a continuación, se indican: a oncóloga do Hospital Universitario da Coruña, Begoña Graña, a directora da Fundación Naru e acompañante de pacientes oncolóxicos, Andrea Castromil, e Sole Candal, Nacho Cobián, Ariadna Amor, Tania Casal Fraga e Carolina Pan, que falarán sobre o seu día a día con esta enfermidade.

A iniciativa estará aberta a toda a cidadanía e non se require inscrición previa. O límite estará marcado polo aforo do salón de plenos.