Cambre está a asinar un auténtico éxito co seu Ciclo de Teatro de Outono. Tanto é así, que o Concello encheu nas tres últimas representacións, tendo mesmo que habilitar unha lista de espera. Desde o seu inicio, no mes de outubro, representouse unha obra por semana, abarcando distintos xéneros e públicos. O centro sociocultural do Graxal acollerá este domingo, 19 de novembro (19.00 horas), O refuxiado, a penúltima función do programa.

A compañía Stracciatella teatro será a encargada de contar esta historia sobre un político que acepta o consello do seu audaz xefe de gabinete para resolver un xuízo por corrupción. A proposta, que se realiza a través da Rede Cultural da Deputación da Coruña, está pensada para público a partir de 16 anos.

Bravas, de Isabel Risco, será a actuación coa que se pechará o programa outonal. Trátase do segundo espectáculo unipersoal de Risco no que ofrecerá a súa particular visión da historia das mulleres galegas. Unha historia sempre roubada, escondida e invisibilizada. Será o 26 de novembro, ás 19.00 h, tamén no centro sociocultural do Graxal.

A entrada é gratuíta, pero as persoas interesadas deberán reservar as súas entradas a través do teléfono 881 917 432 ou do 649 891 212 o propio día do evento.