Cambre volverá ser fonte de inspiración e lenzo para os catro artistas que participarán na próxima edición do Cromático Mural Fest. O alcalde, Óscar García Patiño, o concelleiro de Cultura, David Saborido, e o comisario, Arcadi Poch, presentaron, esta mañá, o programa da sexta edición do festival, que contará, como noutras ocasións, con muralistas de Galicia, doutros puntos de España e mesmo do estranxeiro, procedentes de Portugal e China.

A edición de 2022 incorporou unha importante novidade: a inclusión das parroquias na ecuación. Ante a boa acollida, o Concello decidiu redobrar a súa aposta, dispersando esta disciplina artística tanto nas zonas urbanas como nas rurais. En total, haberá catro muros e pintarase, así mesmo, un mural colaborativo na Barcala. A localización das paredes será a seguinte:

• Estrada Cambre – O Temple nº. 3: a artista chinesa, Satr, será a encargada de poñer cor a este muro.
• Casa do Pobo de Meixigo: o catalán, Tope Skinwalls, realizará unha auténtica tatuaxe que ocupará toda a fachada exterior do local.
• Paseo dos Templarios nº. 10: a galega, Lida Cao, realizará unha obra na que a protagonista será unha das figuras máis importantes da historia de Cambre, María Pita.
• Lugar de Castrobo nº. 6 (Sigrás): Ricardo Romero, natural de Portugal, realizará a obra nesta parroquia.

Durante a súa intervención, o rexedor lembrou o gran “éxito e relevancia internacional” que o festival adquiriu en 2022. Dous dos murais feitos o ano pasado, o Fendetestas de Mon Devane e Enraizado no presente de Huariu, posicionáronse na clasificación da plataforma global Street Art Cities: “estes dous nomeamentos son xa un motivo para sentirse orgulloso e para seguir apostando por esta cita artística e cultural”, explicou o alcalde. Na mesma liña, o edil de Cultura sinalou o privilexio que supón poder gozar desta “arte efémera”. Saborido comentou que nesta edición se contará con “artistas de renome e cunha representación igual de homes e mulleres”.

Programa completo

O programa deste ano incluirá varias actividades formativas. Por unha banda, realizarase unha masterclass de muralismo xeométrico a cargo de Spogo (entre o 24 e o 26 de xullo na urbanización A Barcala). Polo outro, Viviana Luccisano impartirá un taller de iniciación á arte urbana en casa Arrigada. Esta proposta terá lugar tamén entre o 24 e o 26 de xullo.

Na oferta destaca, así mesmo, o mural colaborativo. Nesta edición, a obra plasmarase na Barcala e estará coordinada polo autor Spogo. A iniciativa, que terá lugar entre o 27 e o 29 de xullo, está aberta a toda a cidadanía, que pode sumarse deixando o seu sinal artístico. O Cromático Mural Fest concluirá o venres, 28 de xullo, cunha visita guiada aos murais (19.00 horas).

As persoas interesadas en anotarse nalgunha destas actividades poderán facelo a través da páxina web omix.cambre.es.