Hoxe publícase no Boletín Oficial da Provincia (BOP) a convocatoria e as bases reguladoras do proceso selectivo para a provisión en comisión de servizos de trece prazas vacantes na Policía Local. Este proceso ten como obxectivo reforzar a estrutura de seguridade municipal ata a provisión definitiva das prazas.

As persoas interesadas poderán presentar as súas solicitudes no rexistro electrónico xeral do Concello de Cambre nun prazo de sete días contados a partir do día seguinte á publicación do anuncio no BOP. Este anuncio será tamén publicado na páxina web municipal e nos taboleiros de anuncios do Concello.

Para poder participar os aspirantes deberán ter a condición de persoal funcionario de carreira pertencente á escala básica, categoría de Policía Local, subgrupo C1. Tamén debe atoparse en situación de servizo activo.

Unha vez finalizado o prazo de presentación de solicitudes, aprobarase a lista provisional de admitidos e excluídos, que será publicada nos taboleiros e a páxina web municipal. Unha vez neste punto, concederanse dous días para facer reclamacións. De non habelas, ditarase a resolución declarando a lista como definitiva.