O Concello promocionará os seus principais atractivos turísticos na feira Primavera no Camiño Inglés deste sábado, 10 de xuño. A cita levarase a cabo no encoro de Beche e nela, Cambre contará cun expositor propio no que dará a coñecer algúns dos recursos turísticos máis importantes do municipio.
O Concello elaborou un vídeo turístico con imaxes da igrexa de Santa María de Cambre, do paseo do río Mero, o Museo Arqueolóxico, a ría do Burgo – O Temple e o encoro de Cecebre, entre outros lugares. A maiores, levará material promocional como dípticos, libros e camisetas para dar a coñecer algúns dos principais reclamos turísticos e os eventos culturais que se celebrarán, este verán, en Cambre: a romaría castrexo-romana Galaicoi, o Rock in Cambre e o Cromático Mural Fest.
Ademais da disposición da caseta, Cambre contará cunha actividade propia dirixida pola empresa Acastrexa, asentada no municipio. En concreto, a proposta consistirá nun taller sensorial de bebidas da Reserva de Biosfera Mariñas Coruñesas e Terras do Mandeo. A actividade terá lugar entre as 12.00 e as 13.00 horas. Outra das empresas do concello que estará presente na Primavera no Camiño Inglés será Lenatt, unha compañía especializada en cremas e que conta co selo do CRAEGA.
