Cambre desvelará os segredos mellor gardados da arte a través dun ciclo de conferencias impartido por Juan Massana

23 Abr 2024

Segredos e detalles da arte que, ao longo da historia, permaneceron ocultos. Ese é o fío condutor co que se idea Segredos detrás dun cadro, un ciclo de seminarios organizado polo Concello e que estará impartido polo pintor, profesor, poeta e veciño de Cambre Juan Massana. A iniciativa comezará o 30 de abril cun primeiro relatorio e prolongarase ata o 20 de maio. En total, celebraranse catro charlas e en cada unha abordarase unha cuestión distinta, aínda que todas elas manterán a cara oculta da arte como tema central.

O concelleiro, David Saborido, explica que esta iniciativa poñerase en marcha en vista “do gran interese amosado pola veciñanza con respecto ao programa Historias detrás dun cadro e á charla sobre Teoría e usos da cor impartida tamén por Juan Massana”.

O primeiro día (martes, 30 de abril), o ciclo inaugurarase con Grandes falsificadores. Os Guiness da falsificación. Unha semana despois, o día 7 de maio, Massana impartirá As vacacións da Gioconda. O martes, 14 de maio, o pintor falará sobre unha das obras de arte máis importantes de Miguel Ángel, a Capela Sixtina. Segredos detrás dun cadro pecharase co relatorio As pinceladas máis escuras de Picasso o luns, 20 de maio.

Todos os relatorios serán na Casa da Cultura Vila Concepción ás 19.30 horas. A entrada é gratuíta, pero as prazas son limitadas. Así, as persoas interesadas deberán inscribirse en cada charla de forma individual chamando ao teléfono 981 61 31 93.

Tamén che pode interesar