A descuberta do Choqueiro, un dos personaxes máis tradicionais do Entroido, supuxo o pistoletazo de saída para o Entroido en Cambre. A concelleira de Cultura, Mónica Varela, e a edil de Desenvolvemento Asociativo, María Carmen Pan Matos, foron as encargadas de dar a benvida a este período festivo, simbolizado a través da colocación deste boneco, que presidirá a Casa do Concello ata o domingo, 26 de febreiro.
Con este acto, o Concello busca rememorar unha tradición moi común nas parroquias de Cela ou Brexo Lema, entre outras. Os veciños e veciñas destes lugares adoitaban colocar este tipo de figuras na entrada dos seus domicilios, recibindo así o período de Entroido. O Choqueiro (tamén coñecido como Meco) é un personaxe vinculado ás desviacións morais e ao que se lle atribuían cualificativos como os de lacazán ou lambón. De feito, coñéceselle pola súa debilidade pola comida ou polo diñeiro.
Transcorrido o Entroido, e tal e como reza a tradición, o Choqueiro abandonará o seu lugar privilexiado na Casa do Concello e daráselle eterna sepultura.
Festas infantís
Como parte da programación do Entroido en Cambre, o Concello levará a cabo dúas festas infantís dirixidas a público familiar e, especialmente, aos máis pequenos e pequenas. As citas serán o luns, 20 de febreiro, e o martes, día 21. A primeira celebrarase no pavillón do Graxal o luns, entre as 17.00 e as 20.00 horas, mentres que a segunda terá lugar o martes, no mesmo horario, no pavillón Sofía Toro. Os eventos incluirán zona de xogos e inchables, área para bebés de 0 a 3 anos e chocolate para o público asistente.
Concurso de disfraces, carrozas e comparsas
O Concello pechará o luns, 20 de febreiro, o prazo de inscrición para apuntarse ao concurso de disfraces, carrozas e comparsas do Entroido Pequeno Máis Grande do Mundo. O certame repartirá máis de 2.000 euros en premios entre as diferentes categorías.
As persoas interesadas en participar poderán anotarse mediante a presentación da solicitude nos Rexistros de Cambre (pedindo, para iso, cita previa) ou a través da sede electrónica.
