O Concello iniciou, esta semana, as obras de ampliación do Complexo Deportivo da Barcala. O proxecto, adxudicado por 271.579 euros (IVE incluído), supoñerá a construción dunha sala diáfana de 100 m2. Así, as intervencións resultarán na creación dunha estancia no semisoto, onde se atopa, actualmente, o patio-xardín. Como avanza o concelleiro de Deportes e Xuventude, Daniel Mallo, a execución destes traballos realízase coa vista posta na licitación “da nova concesión do complexo”. A previsión é que o aumento de espazo útil da dependencia “sirva como aliciente para que as empresas presenten as súas ofertas, ofrezan máis e mellores actividades á veciñanza e, polo tanto, se poida garantir un servizo de calidade para os usuarios e usuarias, que é a nosa prioridade”.

As actuacións previstas non afectarán á distribución actual do edificio, xa que se expón a execución dun volume totalmente independente. Esta nova sección dispoñerá de acceso desde as escaleiras e o ascensor, que xa chegan ao semisoto e permiten a entrada ao ximnasio. A conexión con esta zona adicional realizarase a través dun corredor que estará situado na esquina do ximnasio. Este corredor conectará o desembarco das escaleiras e o ascensor co patio, sen necesidade de pasar polo ximnasio.

Trátase dunhas actuacións que o concelleiro de Deportes cualifica de “fundamentais” e que posibilitarán a organización dun maior número de actividades deportivas para os usuarios e usuarias desta dependencia.

O Concello xa sacara o proxecto a contratación por 187.187 euros, pero a licitación quedou deserta pola subida xeneralizada de prezos, obrigando a aumentar o orzamento de execución por contrata ata os 274.322,69 euros.

Nova concesión

Os pregos da nova concesión están en fase de tramitación coa previsión de que poidan saír a licitación o máis axiña posible. O edil de Deportes sinala que se trata “dunha prioridade para este goberno coa que daremos resposta ás demandas dos usuarios e usuarias desta instalación” e apunta que a mellora máis importante “será a relacionada cos horarios de apertura”. As melloras neste sentido supoñerán suprimir as horas de peche ao mediodía e a ampliación do horario os sábados e domingos, incrementando así as horas de uso por parte dos usuarios e usuarias de forma considerable.