O Concello de Cambre pon en marcha un ano máis o programa Xogando no Nadal, que se desenvolverá neste período vacacional do Nadal e conta con 168 prazas. A iniciativa, que reforza a aposta do goberno local pola conciliación, está dirixida ao alumnado de 4º, 5º e 6º de Educación Infantil, de todos os cursos de Primaria, e de 1º de ESO.

O programa de conciliación desenvolverase no CEIP Wenceslao Fernández Flórez de Cambre, con dúas quendas de participación. Deste xeito, o primeiro terá lugar os días 23, 24, 26 e 27 de decembro, mentres que o segundo inclúe os días 30 e 31 de decembro e o 2, 3, e 7 de xaneiro. Neste sentido, as familias poderán optar por inscribir aos seus fillos e fillas nunha ou nas dúas quendas.

Do mesmo xeito que en edicións anteriores, as nenas e nenos participantes realizarán diversas actividades lúdicas, deportivas e culturais relacionadas co Nadal, que estarán complementadas por outros servizos como Mañanceiro, almorzo, comida e transporte, no caso de que conten cun número mínimo de inscricións.

As familias interesadas poderán presentar as súas solicitudes a partir de mañá, mércores 4, e ata o próximo 11 de decembro, ambos os incluídos, a través da Sede electrónica ou dos rexistros municipais. Contarán con prioridade os nenos e nenas empadroadas en Cambre, así como as nais, pais ou titores legais que traballen no municipio.