Cambre fará unha viaxe no tempo para rescatar o seu pasado nobiliario e lembrar a Xoán Fernández de Andeiro, coñecido popularmente como o Conde de Ourém. O Concello organizará, en colaboración coa Asociación de Veciños A Torre de Andeiro, un concerto en honra á figura deste personaxe, un dos máis famosos do século XIV. A actuación será o vindeiro domingo, 6 de outubro, ás 18.30 horas no local social de Andeiro, e correrá a cargo de Iria Estévez. A artista galega chegará ao municipio co seu concerto Fíos de fado, no que estará acompañada por Gonzo Piña. O proxecto está centrado na lusofonía e, ao longo do mesmo, interpretaranse fados, cantigas galegas, mornas etc. Con todo, ademais de recuperar estes estilos musicais, o dúo descubrirá ao público tamén outros sons procedentes de países como Cuba, Brasil e México, entre outros. A formación leva anos traballando e actuando en eventos culturais e salas de toda España, dando a coñecer tanto temas propios como versións. Con esta actividade, realizada a través da Rede Cultural da Deputación da Coruña, o Concello busca poñer en valor o patrimonio e a historia do municipio. Neste caso, o obxectivo é dar a coñecer a Fernández de Andeiro, alcalde, diplomático e cabaleiro, entre outros títulos. O coñecido como Conde de Ourém logrou unha unión entre Portugal e Inglaterra e mesmo alcanzou o apoio de potencias estranxeiras en contra do Reino de Castela e de Enrique II. Dise que este cambrés estivo a piques de converterse no Rey de Portugal tras o falecemento do monarca Fernando I de Portugal.