A Axencia de Desenvolvemento Local de Cambre ofreceu, desde o 2015, medio centenar de cursos financiados polo Concello a través do seu plan municipal de formación. Así o confirma o concelleiro de Desenvolvemento Socioeconómico, Diego Alcantarilla, que reafirma o compromiso do goberno local “por continuar poñendo en marcha accións e programas a través do plan municipal de formación e que estean adaptados ás demandas do mercado laboral e ás necesidades que nos transmiten as propias persoas participantes”.

Tendo en conta os datos da ADL, no 2015 realizáronse sete cursos. Ao ano seguinte, a cifra alcanzou os dez, e no 2017 foron seis os que levaron a cabo. No 2018, a Xunta de Galicia limitou o máximo de horas ao día para impartir as sesións formativas, alongándoas e facéndoas coincidir co curso escolar. A modificación aplicada polo organismo autonómico na súa programación propia limitou a oferta municipal tanto no 2018 como 2019, cando Cambre celebrou dous cursos (un por ano).

A prevención de riscos laborais, a procura de emprego, a informática, as competencias clave, manipulación de alimentos e a pilotaxe de drons foron algunhas das temáticas centrais destas accións.

Emerxencia sanitaria

O número de propostas viuse incrementado coa irrupción da crise sanitaria. Tanto é así, que en 2020 e 2021 o Concello impartiu 25 dos 50 cursos contabilizados desde o 2015. Desta forma, a través do Cambre Dixital-Empresas e do Cambre Dixital-Emprego, o Concello impulsou programas para estimular a adaptación dos empresarios, emprendedores, traballadores de empresas do municipio e persoas en situación de desemprego á nova situación socioeconómica marcada pola emerxencia sanitaria.

Neste caso, as iniciativas estiveron centradas no uso das novas tecnoloxías e na transformación dixital como catalizadoras para xerar oportunidades de negocio e para promover a procura de emprego. Ademais da formación puramente teórica, as persoas participantes puideron acceder, ademais, a titorías individuais co equipo docente.