Como parte do programa municipal de Envellecemento activo de Servizos Sociais, o Concello celebrará o vindeiro sábado, 5 de outubro, un concerto dedicado aos máis maiores. A actuación leva o título de Grazas á vida e busca servir de homenaxe aos veciños e veciñas de máis idade.

Raquel Capote, á voz, e César Páez, á guitarra, serán os encargados de poñer o toque musical á cita, interpretando unha serie de boleros clásicos e outros ritmos da música cubana que o público recoñecerá facilmente.
A actuación será o 5 de outubro, ás 17.00 horas, no teatro do Parque da Igrexa. En caso de previsión meteorolóxica adversa, informarase do cambio de localización.

A concelleira de Servizos Sociais e Recursos Humanos, Landa Díaz, explica que esta actividade mantén os mesmos obxectivos que outras accións dentro do programa de Envellecemento activo: “a idea é que os nosos maiores poidan ter alternativas de lecer divertidas e coas que poidan, ademais, manterse activos”.