Cambre será uns dos concellos que participarán no 2º Encontro Estatal de Gobernos Locais e Cooperación Internacional que se celebrará os días 7 e 8 de febreiro na cidade de Lugo e que busca a consecución dos Obxectivos de Desenvolvemento Sostible. O obxectivo desta iniciativa, cuxa sesión inaugural será este martes 7 ás 16:00 horas no Museo Interactivo da Historia de Lugo (MIHL), é dar máis visibilidade ao traballo e esforzo realizado polas administracións locais, deputacións, mancomunidades e redes municipais destacando, á súa vez, o seu papel para conseguir un mundo máis xusto e igualitario. O evento, promovido pola Confederación de Fondos de Cooperación e Solidariedade, a Federación Española de Municipios e Provincias e o Fondo Galego, centrarase no impacto da cooperación municipalista dos países do Sur, a implementación da Axenda 2030 a nivel local ou o novo marco legal que afecta as administracións locais neste ámbito. O programa tamén inclúe debates sobre as novas estratexias na educación para a cidadanía global e sobre a cooperación técnica realizada polo persoal municipal. O Concello asistirá a este encontro non só como participante senón como socio, destacando a importancia de ser partícipes deste evento xa que “as administracións locais somos as máis próximas á cidadanía e desde este punto podemos recoller outro tipo de experiencias e deseñar accións máis enfocadas á xente de a pé”.