O Concello de Cambre, tal e como vén facendo nos últimos anos, pon en marcha diversas medidas e iniciativas que reafirman o seu compromiso co tecido comercial e hostaleiro do municipio. Polo tanto, o executivo local poñerá en marcha a XVI edición do Concurso de Escapatates de Nadal, unha das propostas para dinamizar ambos os sectores.

O concelleiro de Desenvolvemento Local, Patrimonio e Turismo, Ramón Boga, explica que “consideramos necesario seguir coas medidas dirixidas a incentivar as compras e o consumo local nos negocios de Cambre”.

O edil lembra que nas últimas edicións veñen participando ao redor de 40 establecementos do municipio “aos que queremos agradecer ou esforzo, a dedicación e a ilusión que poñen ano tras ano neste concurso, esperando contar cun número similar de participantes nesta edición”.

Neste certame poderán participar comercios, locais e/ou negocios de hostalería e establecementos de servizos que desenvolvan a súa actividade económica no noso termo municipal e teñan un establecemento aberto ao público e un escaparate decorado con motivos do Nadal durante o período comprendido entre o 17 de decembro e o 6 de xaneiro de 2025. Os establecementos estarán identificados cun cartel que deberá colocarse nun lugar visible na vidreira.

Un xurado encargarase de examinar as decoracións dos locais participantes e de determinar cales son os gañadores da competición, facendo entrega de diferentes premios aos establecementos que obteñan unha mellor valoración, cunha dotación conxunta de 4.000 euros.

Así, o primeiro premio será de 1.000 euros, o segundo de 800 e o terceiro de 600 euros. Ademais, entregaranse os seguintes accésits:

– Accésit ao máis sostible: 500 euros

– Accésit á adecuación ao produto: 500 euros

Mantense o premio por votación popular, dotado de 600 euros.

Como novidade máis significativa, e coa finalidade de simplificar a dinámica do concurso, este ano requirirase soamente achegar unha fotografía do escaparate.

Os negocios interesados poden apuntarse desde o día 1 de decembro ata o 16 de decembro de 2024, ambos incluídos. Para facelo, poderán presentar as súas solicitudes de forma telemática ou presencialmente no rexistro do Concello de Cambre.

Toda a información sobre o desenvolvemento do concurso pode seguirse na web do concurso: http://concursoescaparates.cambre.gal/