Tras o éxito da primeira edición, Cambre acollerá este venres, 11 de agosto, o Rock Infantil, unha cita musical coa que o Concello busca transmitir aos máis novos a devoción por este xénero. A cita, enmarcada dentro do programa do Rock in Cambre, contará coas actuacións de Uxía Lambona e a Banda Molona, de Mamá Cabra (Gloria Mosquera e Diego Maceiras) e da Banda Xuvenil Sementeira Cambre. A isto hai que sumar, ademais, a intervención dos alumnos e alumnas de Oratoria do IES Afonso X O Sabio, que se encargarán de conducir o evento.

O concelleiro de Cultura, David Saborido, confía en igualar ou mesmo mellorar “as cifras de asistencia do ano pasado, cando centos e centos de familias se achegaron ao Parque da Igrexa para participar na primeira edición”. O edil sinala que o obxectivo do Rock Infantil é inculcar “aos pequenos e pequenas a paixón que os cambreses e cambresas sentimos polo rock”.

O Rock Infantil comezará o venres, a partir das 18.30 horas. Ao longo da tarde, as familias poderán gozar da música de Uxía Lambona e a Banda Molona, Mamá Cabra (Gloria Mosquera e Diego Maceiras) e a Banda Xuvenil Sementeira Cambre. A maiores, Lola, Jamid e Bautista, do IES Afonso X O Sabio, asumirán o rol como presentadores do evento.

As familias con nenos ou nenas con problemas de audición poderán solicitar cascos especiais antes das actuacións. O Concello entregará aos pequenos e pequenas unha bandana especial do Rock Infantil.