A alcaldesa de Cambre, María Pan, recibiu no salón de plenos da Casa do concello a un grupo de nove estudantes do Liceum Ogólnokształcące im. P. Michałowskiego de Cracovia (Polonia), que durante esta semana vivirán múltiples experiencias grazas a un intercambio lingüístico Erasmus+ co IES David Buján.
O grupo de estudantes polacos, de 17 anos, está acompañado da profesora coordinadora desta experiencia, especialista en español e francés. O alumnado, aínda que non na súa totalidade, estuda español como segunda lingua estranxeira. Os seus correspondentes españois, da mesma idade, están actualmente estudando 2º de bacharelato.
Pan Lesta recibiu ao grupo e fixo unha breve explicación na que destacou os eventos característicos do municipio, como o Entroido Pequeno Máis Grande do Mundo, a Galaicoi, a OpenScience ou o festival Rock in Cambre. Ademais, tamén lles presentou os principais atractivos do municipio, como a Igrexa románica de Santa María de Cambre, o paseo fluvial ou o tramo do Camiño Inglés que pasa por Cambre.
Este roteiro xacobeo é, precisamente, un dos eixos temáticos do intercambio. O alumnado fará unha parte do Camiño Inglés e unha visita a Santiago de Compostela, onde poderán coñecer de primeira man a historia e tradicións da capital galega.
Este tipo de iniciativas non só fomentan a aprendizaxe académica, senón que tamén reforza valores como a convivencia, o respecto ou a amizade.