Historia contada e cantada. Esa é a proposta que o Concello prepara para regresar ao seu pasado nobiliario e rememorar a figura de Xoán Fernández de Andeiro, Conde de Ourém. Tras anos de parón pola crise sanitaria da covid-19, o Concello, a Asociación Cultural San Martín de Andeiro, a Asociación de Veciños A Torre de Andeiro e a Comisión de Festas da parroquia prepáranse para retomar o programa de actos ao redor deste personaxe, un dos máis famosos do século XIV. A actividade terá lugar o domingo, 13 de novembro, a partir das 17.00 horas nas inmediacións do local social da parroquia, ofrecendo ao público asistente unha visita guiada e teatralizada e música.

Con respecto a outros anos, o programa en torno ao Conde de Ourém enriqueceuse. Tanto é así, que este ano dous trobadores valeranse de tres cantigas para contar parte da historia de Fernández de Andeiro. O actor e guía, Suso Martínez, e o cantautor galego, Manoele de Felisa, serán os encargados de relatar a historia ao público. A continuación, caracterizado como Conde de Ourém, Suso Martínez convidará as persoas asistentes a realizar un pequeno percorrido por Andeiro, partindo desde o local social ata os restos da Torre na que naceu o Conde.

A cita cultural seguirá da man da cantante galega Iría Estévez. A artista presentará no municipio o proxecto Camiños do Fado, un concerto no que dará a coñecer os diferentes estilos do xénero.

Con esta iniciativa, o Concello busca poñer en valor o patrimonio e a historia do municipio. Neste caso, o obxectivo é dar a coñecer a Fernández de Andeiro, alcalde, diplomático e cabaleiro, entre outros títulos. O coñecido como Conde de Ourém logrou unha unión entre Portugal e Inglaterra e mesmo alcanzou o apoio de potencias estranxeiras en contra do Reino de Castela e de Enrique II. Dise que este cambrés estivo a piques de converterse no Rey de Portugal tras o falecemento do monarca Fernando I de Portugal.