Cambre volverá a converterse na capital do Entroido ao longo da fin de semana. O concello continuará ostentando o título da man do seu Entroido Pequeno Máis Grande do Mundo, unha cita clave que terá lugar mañá, sábado 8 de marzo. O evento arrincará ao redor das 17.00 horas e incluirá desfile, concurso de disfraces, carrozas e comparsas e música a cargo de Los Sobraos e a súa tecno-rumba e da orquestra Fania Blanco Show.

O Entroido comezará ás 17.00 horas co desfile, que partirá desde as naves do polígono de Cela. A comitiva continuará o seu percorrido ata o núcleo urbano e coa amenización de Batucada Latexo.

Ao redor das 18.00 horas será a quenda do concurso de disfraces, comparsas e carrozas no que, tras a deliberación do xurado profesional, procederase á entrega de premios. A cita estará presentada por Juan Fernán e contará coa amenización de DJ José Underdub.

Ao redor das 21.30 horas, aproximadamente, subiranse ao escenario do Entroido Pequeno Los Sobraos e a orquestra Fania Blanco Show. Os horarios do evento son orientadores.

Enterro da Sardiña

O programa do Entroido concluirá o domingo, 9 de marzo, co Enterro da Sardiña. Ese día daráselle eterna sepultura ao Choqueiro, celebrando, para iso, un velorio no Campo da Feira, a partir das 12.00 horas. Ao remate, o boneco depositarase nun carro para levalo aos Muíños de Norgasa, onde se realizará o tradicional lanzamento do boneco ao río. O acto contará coa amenización musical a cargo da charanga Santa Compaña.

O Choqueiro (tamén coñecido como Meco) é un personaxe vinculado ás desviacións morais e ao que se lle atribuían cualificativos como os de lacazán ou lambón. De feito, coñéceselle pola súa debilidade pola comida ou polo diñeiro.