Cambre volverá facer historia coa súa Entroido Pequeno Máis Grande do Mundo. A cita, cun gran arraigamento no municipio, celebrarase mañá, sábado 25 de febreiro, na capital urbana. O evento incluirá desfile, concurso de disfraces, carrozas e comparsas e música a cargo da orquestra Fania Blanco Show e de Las Supremas de Móstoles. O Concello prevé asinar un auténtico éxito en canto a cifras de participación. Tanto é así, que no desfile do Entroido tomarán parte unhas 300 persoas entre as diferentes categorías do certame: á parte dos disfraces individuais, inscribíronse 30 grupos nas modalidades de carrozas e comparsas.

A cita comezará ao redor das 16.30 horas co inicio do desfile. Este partirá desde a rúa Wenceslao Fernández Flórez para continuar polo polígono de Graduil e concluír na zona do Campo da Feira. O percorrido estará amenizado pola música da charanga Latexo Percusión e estará presentado por Juan Fernán.

Ao redor das 18.30 horas será a quenda do concurso de disfraces, comparsas e carrozas no que, tras a deliberación do xurado profesional, procederase á entrega de premios. O dj José Underdub encargarase de poñerlle o toque musical a esta parte do Entroido.

A partir das 21.00 horas, subiranse ao escenario do Entroido Pequeno a orquestra Fania Blanco Show e Las Supremas de Móstoles, o prato forte da cita carnavalera. Os horarios do evento son orientadores.

Enterro da Sardiña

O Concello despedirá o domingo, 26 de febreiro, o seu programa de Entroido co Enterro da Sardiña, no que se dará eterna sepultura ao Choqueiro. O velorio terá lugar no Campo da Feira, a partir das 12.30 horas. Ao remate, o boneco depositarase nun carro para levalo aos Muíños de Norgasa, onde se realizará o tradicional lanzamento do boneco ao río. A charanga Santa Compaña amenizará o evento.

O Choqueiro (tamén coñecido como Meco) é un personaxe vinculado ás desviacións morais e ao que se lle atribuían cualificativos como os de lacazán ou lambón. De feito, coñéceselle pola súa debilidade pola comida ou polo diñeiro.